Commissie Monitoring & Toezicht Politiecellen Curaçao ta duna inisio ofisial na su tarea di vigilansia

Komunikado

Minister di Hustisia, señor Nelson Navaro, a instalá aña pasa pa medio di un dekreto, e komishon, Commissie Monitoring en Toezicht Politiecellen Curaçao, abreviá: Commissie Toezicht Arrestantenzorg.

E komishon a haña komo tarea pa vigilá e situashon di detenshon pa personanan será den sèlnan di polis na Barber, Rio Canario i Blòk 1 (situá na prizòn), di hóbennan den detenshon na JJIC (ántes GOG) i na Brasami i tambe di e personanan den kustodia den baraknan di ilegal.

Instalashon di e Komishon aki ta un di e medidanan ku Ministerio di Hustisia a ehekutá pa mehora e kuido na esnan ku ta será den detenshon preventivo.
E investigashon ku a keda kondusí despues di morto di un detenido den sel di polis a mustra riba defisiensianan serio den e situashon di detenshon den sèlnan di polis. E investigadónan a duna tal di rekomendashon pa drecha e “arrestantenzorg”, e kuido na esnan den aresto preventivo i ku ta kai bou di responsabilidat direkto di kuerpo di polis.
E komishon a haña komo tarea pa vigilá e trato di e detenidonan den aresto preventivo i ta ehersé e tarea aki pa medio di inspekshonnan na e lugánan di detenshon ya menshoná. E inspekshon ta enserá e kondishonnan material, e seguridat di e detenido i e trato. Na kada inspekshon e Komishon lo papia tambe ku por lo ménos dos detenido.
Parti di e tarea di e Komishon ta alabes tratamentu di keho ku un persona por tin tokante e trato durante su detenshon dor di polis òf durante su estadia den sel na warda di polis.
Pa duna inisio ofisial na su tarea, e Komishon ta lansa su wèpsait djabièrnè 26 di ougùstùs, 3 or di atardi.
Riba e wèpsait lo tin tur informashonnan nesesario pa personanan ku a keda arestá i pa otro interesadonan.

Nòmber di e wèpsait ta: www.toezichtarrestantenzorg.cw

2016 © CTA-CW